Gen 7 | NOP | STEP | Kaŋ Wapumdi Noa indiŋ yoŋa niŋguk. “Da eŋ wapmihigetam wanakaŋ hogohogok muwage foloŋ lodapmaneŋ. Meeniŋ hogohogok hatiiŋ adi’walaŋ lekiŋgoŋhik ginaŋ du kubugoŋ me didimeniŋ hatilaŋ doktiŋa gabene utumbalak.

Genesis 7

Fiye 7:1-9 Bepaŋdi Noa Nimbuune Muwage Ginaŋ Loguk.

1 Kaŋ Wapumdi Noa indiŋ yoŋa niŋguk. “Da eŋ wapmihigetam wanakaŋ hogohogok muwage foloŋ lodapmaneŋ. Meeniŋ hogohogok hatiiŋ adi’walaŋ lekiŋgoŋhik ginaŋ du kubugoŋ me didimeniŋ hatilaŋ doktiŋa gabene utumbalak. 2 Ale kwet foloŋ hatihati hinit diniŋ youli dapmawaakneŋ doktiŋa du kale walahi adi’walaniŋ maanihi eŋ taamuhi 7, 7, tuwolit tuwolit eŋ kale geŋgeŋnit ^{▼▼7:2-3 Kale walahi be geŋgeŋnit woŋ adi Bepaŋdok muni hemindok diniŋ mede. Mosesdi Yodoko Mede gineŋ yenindidimeguk. Kale noli adi walahi doktiŋa Judahi kedem nayagiŋ tiŋa Bepaŋdok muni kedem hemiyagiŋ. Eŋ kale geŋgeŋnit adi mu nanandok tiŋa Bepaŋdok muni tuwot mu hemindok. Aposolo 10:9-35 uŋoŋ Pita’walaŋ lihine gineŋ mede undiniŋ mintalak.} adi lufom, lufom, unduŋ yanagila bagi heki maaŋ undugoŋ mebimebi 7, 7, maaniŋ eŋ taamuniŋ yanagilune dukut muwage gineŋ loneeŋ. 4 Kaŋ nu melenai 7 dapmaune yobene kwet foloŋ gwi sifo wapum ula yalune hadapmo 40 eŋ timiŋ 40 tibaak. Uŋoŋ kwet foloŋ nu nemenemek hatihati hinit yapmegut hogohogok yehitubuliwedapmawaat.” 5 Kaŋ Noa adi Wapum’walaŋ maŋiŋ mede tagimneeŋ undugoŋ tubudapmaguk.

6 Noa adi guletŋiŋ 600 hatilune wahiŋkade kwet foloŋ ime gabuŋ wapum buguk. 7 Ime gabuŋ wapum agaŋ beene tulune Noa nenee eŋ tamuŋiŋ eŋ mihiŋiŋnabu adi wanakaŋ muwage foloŋ lodapmagiŋ. Ime gabuŋ wapumdi mu nihiŋewek yoŋa unduŋ tigiŋ. 8 Unduŋ tulune kale walahi eŋ geŋgeŋhinit eŋ bagi eŋ miŋgembet, kaleŋgiŋgiŋ, maaniŋ taamuniŋ, 9 lufom, lufom, kwet foloŋ itowiiŋ hogohogok buŋa Noadut muwage foloŋ logiŋ. Bepaŋdi Noa nindidimeguk wondok tuwot hinek logiŋ.

Fiye 7:10-24 Ime gabuŋ wapum busuwaguk.

10 Agaŋ melenai 7 hinek-ku dapmalune ime gabuŋ wapum kwet foloŋ busuwaguk. 11 Noa’walaŋ gulet nai 600 wondiniŋ muyakipŋiŋ 2 wondiniŋ melenai 17 nai uŋaniŋ ime eŋ luhi dombuŋaleeŋ komaŋ duŋaniŋ bediŋa labulune wahiŋniŋ ime diniŋ talik taŋakiyeune 12 gwi sifo miiŋ hinek ula halune hadapmo 40 eŋ timiŋ 40 tuguk. 13 Kaŋ nai uŋaniŋgoŋ hinek Noa malam eŋ mihiŋiye Sem, Ham tiŋa Yafet eŋ tamuhiye adi wanakaŋ hogohogok muwage ginaŋ lodapmagiŋ. 14 Tiŋa kale mimihi eŋ moihi mebimebi tuwolit tuwolit, miŋgembet be kaleŋgiŋgiŋ, mebimebi kwet ginaŋ itouwiiŋ, eŋ bagi mebimebi papali hinit 15 lufom, lufom, hogohogok maaniŋ taamuniŋ tuwolit tuwolit adi hogohogok Noadut lodapmagiŋ.

16 Nemek hatihatinit nemu bikabuŋit. Bepaŋdi Noa nindakaleguk wondok tuwolit lodapmagiŋ. Lodapmalune Wapumdi talik teheŋa talik fofoŋ fakaŋkade youkilitiguk. 17 Unduŋ tulune ime gabuŋ kakaŋ hinek busuwaune melenai 40 wondok tuwot ime heki adi bediŋa loge loge muwage kwehene tiŋa loune kwet bikabuŋa ime foloŋ folooniŋ loguk. 18 Kaŋ ime wapuhi kisaŋ bediŋa bateyeŋ kwetkwet kufuladapmaune muwage adi ime foloŋ folooniŋgoŋ uŋat buŋat tihatiguk. 19 Tiŋa ime heki adi dombuŋaleeŋ loge loge kwebobe kweheyehi yaliwiiŋ wanaŋ yehikufuladapmagiŋ. 20 Imedi kweboboe boki 20 fit ^{▼▼7:20 Woŋ adi 7 mita.} wondok tuwot kalakapmeeŋ loguk. 21 Unduŋ tubune kwet foloŋ nemek hatihati hinit liwedapmaguk, bagi, kale mimihi, kale moihi, kaleŋgiŋgiŋ, miŋgembet heki kwet foloŋ itowagiŋ hogohogok, eŋ meeniŋ wanaŋ kumuŋdapmagiŋ. 22 Kwet foloŋ nemek hatihati hinit hogohogok meeniŋ be kale heki be, kaleŋgiŋgiŋ be, bagi heki yehitubuliwedapmaguk. Noa eŋ adut muwage maaneŋ hatigiŋ adi hogok biyabuguk. 24 Kaŋ ime wapuhi adi kwet foloŋ dombuŋale looŋ hatune melenai 150 dapmaguk.